Сејдини: Како што ветивме, брзо се договоривме со Ангеловски

Фудбалската федерација на Македонија му даде нова доверба на селекторот Игор Ангеловски да го предводи националниот тим и на Европското првенство. Претседателот Муамед Сејдини вели дека брзо паднал договор со Ангеловски за ова соработка, која денеска е официјализирана и од УО на ФФМ.    

„Како што ветивме пред јавноста за нашиот прв избор за селектор, денеска потврдуваме дека го продолжуваме патот кон успехот. Со Игор лесно се договоривме за сите детали околу продолжување на соработката бидејќи и кај него и кај нас владееше позитивно расположение успехот што го направивме да го продолжиме заедно. Ние сме професионалци и знаеме дека добрите резултати даваат поголема шанса за задржување на некоја позиција. Горди сме на сѐ што направивме како репрезентација и федерацијата ќе продолжи да обезбедува најдобри услови за работа, како што впрочем беше и досега. 

Селекторот со својот стручен штаб во одлична атмосфера сега треба да се подготвуваат за квалификациите за Светското првенство и Европскиот шампионат. Сите ние посакуваме да нѐ поведат кон нови успеси. Верувам дека Македонија ќе го покаже вистинското лице и праќам апел до целата нација и сите навивачи да бидеме сложни и да покажеме единство. Пласманот на Европското првенство е сон за секое дете, а фудбалерите сега имаат исклучителен мотив за нови победи. Сега треба да помогнеме сите, на било кој начин, а потоа ќе зборуваме за нашиот пласман на Европскот првенство и колку тоа значи за иднината на македонскиот фудбал“,
изјави претседателот Сејдини за официјалниот сајт на федерацијата.


G-G32VEZ5NYJ